【正經post】CV唔好打身份證number同埋full address
有冇試過有人打嚟叫你見工, 而你係完全唔知自己send過去呢間公司應徵呢? 我指嘅並唔係獵頭公司, 而係嗰啲奇奇怪怪唔肯開名, 甚至係基金、投資、健康保健品或者證券公司。仲有, 有冇諗過點解你會收到一啲推銷電話, 而對方係講得出你個名或者你個姓?
每日收到好多cv, 梗有幾隻會犯同一錯誤, 就係有齊身份證號碼、屋企電話number同埋完整屋企地址, 如果你都有打落去份cv度, 記得盡快刪除咗佢, 因為作為考量呢個人適唔適合呢份工, 以上幾樣嘢都係多餘, 而就算對方真係覺得重要, 你都可以喺核實對方乜頭乜路之後, 或者親身上去見工填form嗰陣先至交代。
香港人最鍾意用嘅Jobsdb, 除咗可以俾啲公司刊登招聘廣告之外, 仲可以俾佢哋買CV, 雖然Jobsdb已經修咗例, 一定要公司出全名, 同埋要有商業登記先可以落招聘廣告, 但你唔好忘記, 就算倫敦金同財仔都一樣可以有商業登記, 而其實當呢啲公司俾錢Jobsdb買招聘廣告package嗰陣, 係包埋一樣嘢叫做coins, 例如A公司買一個包40隻廣告嘅plan, 就會附送4,000個coins, 50個coins可以買到一份cv, 4,000個coins即係可以買80隻cv。
正經公司或者獵頭公司搵你梗係冇所謂啦, 但如果你份cv落入以上嗰啲立心不良, 想打你主意嘅公司手上, 有你身份證number同埋full address係超級危險, 坊間有啲財仔直情有身份證number已經可以借錢架喇！
當然Jobsdb有得俾你揀唔open隻cv, 無可否認set "Limited Profile"係會削弱咗機會, 真正嘅有心人搵你會迂迴咗, 對於積極搵工而又想保存私隱嘅人, 係會陷入兩難局面, 所以你隻cv照open係冇問題, 但唔該刪除咗身份證number同埋full address先。
地址: 有地區已足夠, 例如寫沙田, 但唔需要寫埋金獅花園幾樓幾室
電話: 有手提夠晒啦, 如果搵唔到你, 正經公司會email你
身份證號碼: 危險! cv唔需要, 親身去見工, 知道係正當公司先至填
#求職陷阱 #jobsdb
Search